Dekabrın 16-da Heydər Əliyev Mərkəzində “Yollarda təhlükəsiz davranışı öyrənək” şüarı altında orta ümumtəhsil məktəblərinin şagirdləri arasında intellektual yarış olub. Artıq ikinci ildir ki, baş tutan yarış Heydər Əliyev Mərkəzi, Elm və Təhsil Nazirliyi, Azərbaycan Avtomobil Federasiyasının birgə təşkilatçılığı, “Regional İnkişaf” İctimai Birliyinin dəstəyi ilə keçirilib.

Layihə müxtəlif yaş qruplarından olan yol hərəkəti iştirakçılarının həyat və sağlamlığının qorunması, yollarda təhlükəsiz və mədəni davranışın təbliği, məktəblilərin yol hərəkəti qaydaları barədə maarifləndirilməsi və nəqliyyat vasitələri ilə tanışlığının təmin edilməsi məqsədi ilə reallaşır. İntellektual yarışda Bakı şəhərindəki 55 orta ümumtəhsil məktəbinin 7-8-ci sinif şagirdlərindən ibarət komandalar iştirak edib.

3 turdan ibarət yarışda yol hərəkəti qaydaları, avtomobillərin tarixi, nəqliyyat vasitələri, piyadalar və velosipedçilər, avtomobillərin quruluşu və təchizatı, işıqforlar, yol nişanları, yol hərəkəti qaydaları və digər mövzular üzrə suallar səsləndirilib.

Sonda qaliblərin mükafatlandırılması mərasimi keçirilib.

Qeyd edək ki, iştirakçıların müəyyən olunmuş mövzular üzrə hazırlığı məqsədilə dekabrın 9-da Heydər Əliyev Mərkəzində onlar üçün təlim də keçirilib, Azərbaycan Avtomobil Federasiyasının müvafiq nəşrləri təqdim olunub, münsiflər heyətinin nümayəndəsi, ekspert Ərşad Hüseynov tərəfindən yol hərəkəti qaydaları və yarışın əhatə etdiyi mövzulara dair məlumatlar verilib.