Əziz gənclər müxtəlif təhsil müəssisələrinə, iş yerlərinə, idman zallarına, əyləncə və istirahət məkanlarına üz tutarkən piyada, sərnişin, sürücü, velosipedçi qismində yollarda olursunuz. Dövrümüz küçə və yollarda nəqliyyatın artması, hərəkət şəraitinin mürəkkəbləşməsi ilə də əlamətdardır. Bu səbəbdən yollarda nizam-intizamın, təhlükəsizliyin zamanın tələblərinə uyğun təmin edilməsi çox vacibdir. Sizin üçün hazırlanmış bu kitabın əsas məqsədi yollarımızda təhlükəsiz davranışın həyat tərzinə çevrilməsinə töhfə verməkdir. Cəmiyyətin ən fəal qismi olan gənclər yenilikçiliyin əsas mənbəyidirlər. Odur ki, yol hərəkəti sahəsində yeni yanaşmaların, müasir, daha təhlükəsiz davranış tərzinin məhz gənclər tərəfindən bərqərar ediləcəyi şübhəsizdir. Bu kitab həmin vacib sosial missiyanın yerinə yetirilməsində gəncliyə dəstək üçün çap edilmişdir. Yol hərəkəti qaydaları o qədər də mürəkkəb deyildir. Sizə təqdim olunan kitab həmin qaydaları daha rahat və aydın şəkildə mənimsəməyə yardımçı olacaqdır. Unutmaq olmaz ki, müasir fəal insan təkcə öyrənməklə kifayətlənməməli, həm də bacardığı dərəcədə başqalarını öyrətməlidir. Yol hərəkətində başqalarını öyrətməyin ən gözəl variantlarından biri isə yollarda intizamlı hərəkət etməklə yaxşı nümunə göstərməkdir. Deməli, yollarda təhlükəsiz davranışı həyat tərzinə çevirərək təkcə özünüzün yox, həm də başqalarının təhlükəsizliyini təmin edəcəksiniz.
