Azərbaycan Avtomobil Federasiyasının dəstəyi ilə ümumdünya nəqliyyat vasitələrinə aid “Tarixə Dörd Çarxla” adlı kitab nəşr olunub. Kitab ABŞ, Almaniya, Böyük Britaniya, Fransa, İtaliya, Rusiya və keçmiş SSRİ-də istehsal olunmuş yüzdən çox nəqliyyat vasitələrinin XIX əsrin sonlarından başlayaraq dövrümüzə qədər olan tarixi əhatə edir. Kitabı hazırlamaqda əsas məqsəd düzgün tarixi xronologiya vasitəsilə oxuyuculara əsrlər boyu müxtəlif dizaynlarda istehsal olunmuş nəqliyyat vasitələri haqqında geniş məlumat verməkdir. Həmçinin oxucuların diqqətini cəlb etmək üçün kitabımızda avtomobillərə aid seçilmiş rənqarəng afişalar, maraqlı faktlar, onların istehsalı üzrə dahi şəxsiyyətlərin bioqrafiyası, tanınmış avtomobil təkər istehsalçıları və prestijli trofeylər barədə tarixi məlumatlar qeyd olunub. Bununla yanaşı, kitabla tanış olacaq oxucular dünya şöhrətli avtomobil istehsalçılarının zəngin irsini əks etdirən çoxlu nadir eksponatlara məxsus tarixi şəkil nümunələri ilə də tanış ola bilərlər.
